કોરિયોગ્રાફર બૉસ્કો માર્ટિસે અક્ષયકુમારની ડિસિપ્લિન અને કામ પ્રત્યેની લગનની ખૂબ પ્રશંસા કરી છે. તેનું કહેવું છે કે અક્ષયકુમારને ૧૦૨ ડિગ્રી તાવ હતો અને ૪ ડિગ્રી તાપમાનમાં પણ તેણે સતત કામ કર્યું હતું. અક્ષયકુમારની આગામી ફિલ્મ ‘બડે મિયાં છોટે મિયાં’નાં ચાર ગીતોને બૉસ્કોએ કોરિયોગ્રાફ કર્યાં છે. આ ફિલ્મમાં ટાઇગર શ્રોફ, સોનાક્ષી સિંહા, માનુષી છિલ્લર અને અલાયા ફર્નિચરવાલા પણ લીડ રોલમાં દેખાશે.
અલી અબ્બાસ ઝફરે ડિરેક્ટ કરેલી આ ફિલ્મ ઈદ દરમ્યાન રિલીઝ થવાની છે. અક્ષયકુમારની પ્રશંસા કરતાં બૉસ્કોએ કહ્યું કે ‘તેમની સાથે કામ કરવાની મજા આવે છે. તમે જ્યારે તેમની સાથે કામ કરો છો તો તેઓ ગજબનાં સલાહસૂચનો આપે છે. ક્યારેક હું એ સાંભળું છું અને ક્યારેક નથી સાંભળતો. ક્યારેક મારે સાંભળવું પડે છે.’
અક્ષયકુમારની કામની રીતભાત વિશે બૉસ્કોએ કહ્યું કે ‘તેઓ આઠ કલાક કામ કરે છે, પરંતુ એ આઠ કલાક દરમ્યાન તેઓ સેટ છોડીને નથી જતા. જોર્ડનમાં શૂટિંગ હતું ત્યારે તેમની તબિયત ઠીક નહોતી. તેમણે રિહર્સલ નહોતાં કર્યાં. તેમને ૧૦૧-૧૦૨ ડિગ્રી ફીવર હતો પરંતુ તેઓ ડાન્સ કરતા હતા અને બ્રેક પણ નહોતો લીધો. ૪ ડિગ્રી ટેમ્પરેચરમાં અમે ચાર ગીત બૅક-ટુ-બૅક શૂટ કર્યાં હતાં.’
શૂટિંગ બાદ જ્યારે સૌકોઈ પોતાના રૂમમાં આરામ કરતા ત્યારે અક્ષયકુમાર વૉલીબૉલ રમતો હતો. એ વિશે બૉસ્કોએ કહ્યું કે ‘ડાન્સ બાદ સાંજે તેઓ વૉલીબૉલ રમવા જતા હતા. અમે બધા તો થાકીહારીને રૂમમાં આરામ કરતા હોઈએ અને તેઓ અમને વૉલીબૉલ રમવા બોલાવતા હતા. સેટ પર તેઓ શાનદાર એનર્જી લઈને આવતા અને ક્રૂને જોડી રાખતા હતા.’