9 માર્ચ શનિવારના રોજ ડરહમ અને ઇગલ્સ વચ્ચે રમાયેલી ઝિમ્બાબ્વે ડોમેસ્ટિક T20ની ફાઇનલ મેચમાં, ડરહમ ટીમે 213 રનથી એકતરફી જીત મેળવી હતી. આ મેચમાં 230 રનનો પીછો કરવા ઉતરેલી મેશોનાલેન્ડ ઈગલ્સ (Mashonaland Eagles) ટીમ માત્ર 8.1 ઓવરમાં 16 રનમાં જ ઓલ આઉટ થઇ ગઈ હતી. ફાઈનલ મેચમાં ટીમનું શરમજનક પ્રદર્શન રહ્યું હતું.
મેશોનાલેન્ડ ઇગલ્સ ટીમે T-20 ક્રિકેટમાં ત્રીજો સૌથી ઓછા સ્કોરનો રેકોર્ડ બનાવ્યો છે.
જીત માટે 229 રનનો ટાર્ગેટ આપ્યો હતો
પ્રથમ બેટિંગ કરતા ડરહમની ટીમ માટે વિકેટકીપર બેટ્સમેન ઓલી રોબિન્સને 20 બોલનો સામનો કરીને 49 રન બનાવ્યા હતા. ઈંગ્લેન્ડ વિરુદ્ધ ભારતની પાંચમી ટેસ્ટમાં ઈંગ્લેન્ડના પ્લેઈંગ-11માં ઓલીનો સમાવેશ કરવામાં આવ્યો ન હતો અને તે હરારેમાં આ અંતિમ મેચ રમવા આવ્યો હતો. તેના સિવાય બાસ ડી લીડે 58 રનની ઇનિંગ રમી હતી. હેડન મસ્ટર્ડે અણનમ 46 રન બનાવ્યા હતા.
16 રનમાં ટીમ ઓલ આઉટ થઇ ગઇ
ઈગલ્સ ટીમની શરૂઆત ખરાબ રહી હતી. બંને ઓપનર શૂન્ય રને આઉટ થયા હતા. મેથ્યુ વેલ્ચ 1 રન પર પેવેલિયન પરત ફર્યો હતો. આ રીતે આખી ટીમ પત્તા ઢેરની જેમ અલગ પડી ગઈ હતી. ઈગલ્સ ટીમના 5 બેટ્સમેન શૂન્ય રને આઉટ થયા હતા. ટીમનો કોઈપણ બેટ્સમેન 4થી વધુ રન બનાવી શક્યો નહોતો.
સૌથી ઓછા સ્કોરના રેકોર્ડ વિશે જાણો
T20 ક્રિકેટમાં સૌથી ઓછા સ્કોરનો રેકોર્ડ દેશ આઈલ ઓફ મેનના નામે છે. 26 ફેબ્રુઆરી 2023ના રોજ સ્પેન સામેની 6ઠ્ઠી T20ની છેલ્લી મેચમાં આઈલ ઓફ મેન ટીમ 8.4 ઓવરમાં માત્ર 10 રનમાં ઓલઆઉટ થઈ ગઈ હતી. જવાબમાં સ્પેને 0.2 ઓવરમાં કોઈ વિકેટ ગુમાવ્યા વિના 13 રન બનાવીને મેચ જીતી લીધી હતી.
આઈલ ઓફ મેન મેચ બાદ સિડની થંડર ટીમનું નામ બીજા સ્થાને છે, જે બિગ બેશ લીગમાં એડિલેડ સ્ટ્રાઈકર્સ સામે 15 રનમાં આઉટ થઈ ગઈ હતી. T20 ક્રિકેટમાં ત્રીજો સૌથી ઓછો સ્કોર હવે મેશોનાલેન્ડ ઈગલ્સના નામે જોડાઈ ગયો છે. ડરહમની 213 રને જીત T20 ક્રિકેટના ઈતિહાસમાં ત્રીજા સૌથી મોટા માર્જિનથી હતી.