અનન્યા પાંડેની ઇચ્છા છે કે તે જયપુરનાં મહારાણી ગાયત્રી દેવીના રોલને ઑન-સ્ક્રીન સાકાર કરે. ગાયત્રી દેવીનો જન્મ ૧૯૧૯ની ૨૩ મેએ પશ્ચિમ બંગાળના કૂચબિહારમાં થયો હતો. ૧૯૪૦માં તેમનાં લગ્ન જયપુરના મહારાજા સવાઈ માન સિંહ દ્વિતીય સાથે થયાં હતાં. ગાયત્રી દેવીએ રાજકારણમાં પણ સક્રિય ભૂમિકા ભજવી હતી. સ્વતંત્ર પાર્ટી નામના રાજકીય પક્ષમાં તેમણે સફળ નેતા તરીકે કામગીરી બજાવી હતી.
ગાયત્રી દેવી સ્ટાઇલ આઇકન તરીકે પણ ઓળખાતાં હતાં. તેઓ વિશ્વનાં સૌથી વધુ સ્ટાઇલિશ રૉયલ મહિલા તરીકે ઓળખાતાં હતાં. તેઓ ભારતનાં જાજરમાન અને આધુનિક મહારાણીઓમાંનાં એક હતાં. ૨૦૦૯માં ૯૦ વર્ષની ઉંમરે તેમનું લંગ ફેલ્યરને કારણે અવસાન થયું હતું.